رواية كوز العسل الفصل السادس بقلم عادل عبدالله حصريه وجديده

الحلقة ٦

نعمة اتعصبت وقالت : يعني انتي عايزة تسبيلي الراجل هفتان و تغذيه  لما تيجي ايامك !!! صحيح انتي بت مش سهلة !! وانا اللي كنت فاكراكي  مش فاهمة حاجة .
هدير : انا مش فاهمة الا اني بحب جوزي وبس .
وبعد الغدا بنص ساعة لبست نعمه وقالتلي انها خارجة .
: رايحة فين يا نعمه ؟
: رايحة للبت عبير .

: ليه ؟ فيها حاجة ؟ 
: لا ابدا سمعت انها تعبانه شوية .
: طيب استني اروح معاكي اطمن عليها .
: لأ خليك انت ملوش لزوم ، ده شوية تعب خفيف كده .
: طيب ما اروح معاكي اطمن علي البت .
: ده شوية تعب حريمي يا راجل هتروح تعمل اي !!
: طيب خلاص روحي ومتتأخريش .
: مش هتأخر ، بس اوعي تلعب بديلك .
: ازاي مش فاهم ؟
: يعني انت والعروسة لوحدكم والنهاردة يومي ولو حصل حاجة وانا بره مش هسامحك .
: لأ مټخافيش يا نعومتي انتي عارفة اني اعمري ما اظلم حد وخصوصا انتي .
: اشمعني انا ؟ 
: علشان انتي اللي قريبة من قلبي .
: ايوه انا قريبة من قلبك لكن هي جوه قلبك .
: ازاي تقولي كده ، اذا كانت هي في قلبي يبقي قلبي كله ملكك انتي .
ضحكت نعمه وهي ماشية وقالت : لما نشوف .
،،،،،،،،،،
نعمة راحت لعبير و كانت مني هناك ، مني اول ما شافتها : عاملة اي معاكي العقربة ؟ 
نعمة : ولا حاجة ، كل واحدة في حالها .
: ايوه يا ماما بس البت دي متعملش راسها براسك .
: ابوكي قسم شغل البيت والنوم ما بيني وبينها .
: بتتكلمي جد !!! 
: ايوه .
: البت دي عرفت تضحك علي ابويا .
: ابوكي هو اللي عايش مراهقة متأخرة .
عبير : يا ماما ابويا لسه صغير ، ده ماشاء الله عليه اللي يشوفه يقول انه اخو حمدي ابنك .
: ايوه دافعي عنه براحتك ، ما انتي طول عمرك بتحبي ابوكي اكتر مني .
: بالعكس يا ماما بس انا بقول الحقيقة  .

: طيب قوليلي بقي عاوزة اي انتي واختك ؟ خلتوني اجي علي ملا وشي ليه النهارده ؟
: هتيجي معايا انا ومني مشوار هترجعي منه برنسيسة زي ما يكون عندك عشرين سنة .
: قصدك اي يا بت ؟؟ قصدك ان ابوكي لسه صغير وانا اللي عجزت ؟!!
: مش قصدي يا ماما ، تعالي بس معانا وانتي هتفهمي كل حاجة .