الحلقة ٣١ من العاصفة بقلم : الشيماء محمد شيموووو

حاجة أو ياخد كتاب يقرأه .. كان جاي يرجع كذا كتاب معاه وياخد غيرهم .. 
دخل وراح حط الكتب اللي في ايده وبيدور هياخد ايه غيرهم .. 
أمل عرفت إنه هو اللي دخل من برفانه فابتسمت بس كان مداريها الكمبيوتر اللي هي قاعدة عليه وبعدين هي اختارت جهاز يكون بعيد عن اللي يدخل أو اللي يخرج علشان تفضل لوحدها .. فكرت تفضل ساكتة تماما لحد ما يخرج وهو أصلا مش هيشوفها ولا هيحس بيها .. بس فضولها خلاها تراقبه وتشوف جاي هنا ليه ! يعني هو عنده اللاب الخاص بيه ! معقولة يكون من النوعية اللي بتحب القراءة نادرا ما بيكون في راجل بيحب القراءة ! هل كريم مختلف ! بترجع بكرسيها لورا علشان تشوفه أكتر بس رجعت جامد وكانت هتقع فعدلت نفسها بسرعة بس صړخت لما كانت هتقع ووقفت وكريم طبعا سمعها وشافها لما وقفت .. 
بصلها باستغراب في ايه مالك أنتي مستخبية كده ليه 
أمل بحرج ماأخدتش بالي إنك دخلت أصلا فأنا مش مستخبية أنا قاعدة عادي ! 
كريم هز دماغه بس مش مقتنع وصړختي ليه في حاجة !
أمل هزت دماغها لا بس الكرسي كان هيقع مش أكتر ! عادي يعني ما تشغلش بالك .
كريم ابتسم وردد الكرسي هيقع ! قلتيلي ! بتعملي ايه هنا أصلا ! المكان ده مش للمتدربين 
أمل بسرعة أخرج يعني ! 
كريم ابتسم أكيد لا.
أمل ابتسمت أنت بتعمل ايه هنا أنت آخر واحد تخيلته يجي هنا ! 
كريم باستغراب ليه ! بحب القراءة وكل الكتب اللي هنا نادرة وكل فترة باخد كام كتاب بقرأهم وأرجعهم واخد غيرهم وهكذا ما تتخيليش كمية المعلومات اللي فيهم .. جربي تقرئي كتاب من هنا وشوفي هتطلعي منه بايه ولا ما بتحبيش القراءة أصلا  
أمل بسرعة لا طبعا بحبها بس ماجربتش موضوع الكتب دي .. ممكن أقرأ روايات أو كتب بسيطة أو دينية لكن مراجع زي دي كانت للمذاكره فقط بناخدها نصور منها الشباتر اللي بندرسها ونذاكرها .
كريم ابتسم ولف بيدور على كتاب معين وهي مستغربة إنه قطع الكلام بالشكل ده فقعدت مكانها ! كريم طلع كتاب وراح ناحية أمل وحط الكتاب قدامها جربي تقرئي الكتاب ده .. ما تقرئيش من باب الاستفادة أو المذاكرة أو تقوية معلومات اقرئيه زي ما بتقرئي روايه مثلا .. هتلاقي نفسك استمتعتي بيه ومخك هيستوعب نقول مثلا ٣٠ ٪؜ في أول مرة وكل ما تقرئي كتاب هتلاقي النسبة دي بتزيد ومخك تلقائي بيسجل المعلومات اللي بيحتاجها .. فهتلاقي نفسك بتقضي وقت ظريف مع كتاب ! بتشغلي نفسك وبتستفادي بطريقة صح بدون أي ذنوب من أي نوع .
أمل ابتسمت وبصت للكتاب قلبت فيه وبصتله هحاول أقرأه كشرت مرة واحدة بس لما أخلص تصميم البرنامج الي أنت دبستني فيه ده ! 
كريم ابتسم وبص للشاشة بتاعتها قلتلك أغيرهولك لو فوق .......
قاطعته ما تقلش فوق قدارتي ! أنت اديتهولي كتحدي لنفسي وأنا قبلت التحدي ده .. وما اتعودتش أنسحب من أي تحدي 
كريم بصلها بإعجاب وبص للشاشة طيب ايه اللي معطلك فيه ! 
أمل كشرت ما تغششنيش !
كريم ضحك أغششك يا بنتي احنا مش بنمتحنكم ! احنا بنشوف قدراتكم ومدى الاستيعاب لكن مش امتحان ورقة وقلم .. وبعدين أنتي عرفتي كام معلومة من ساعة ما بدأتي تصميم البرنامج طلعتي بخبرات قد ايه ! يعني حتى بالمساعدة يا أمل طالما بتشتغلي بايدك فأنتي بتستفيدي وده المطلوب إنكم تستفيدوا .. الموضوع مش مسابقة .
أمل ابتسمت وبتريقة الموضوع بالنسبة لكل المتدربين مسابقة .
كريم كشړ خلاص هنزل أوضحلهم الموضوع ده وهقولهم هنختار بناء على ايه ! المهم وريني واقفة في ايه كده ! بص لساعته قدامي عشر دقايق بالظبط استغليهم .
أمل ابتسمت وبفضول وراك ايه بعد العشر دقايق دول ! 
كريم ابتسم عندي كونفرنس مؤتمر مع الشركة اللي بنتعامل معاها في اليابان ! 
أمل باهتمام اليابان كنت متخيلة بتتعامل مع الصين مش اليابان ! الكل بيتعامل مع الصين 
كريم بجدية ممكن نجيب حاجات من الصين بس قليل أوي لأن معروف إن اليابان الأصل المهم ! استغلي التسع دقايق اللي فاضلين