چرح المشاعر الفصل 7و8 بقلم أمال جوري حصريه وجديده

صابلي بريستيج انا منعرفش قلتلها والله مندير والو ولوكان ساعفتيني ماتديري ماتعيي روحك انا منيش كامل دايرة اهمية لهاذي الخطبة غير نتي لي راكي تجري وحدك _ ايه خاطرش باردة القلب وماعلابالك بحتى واحد ومستهترة بكل حاجة _ ايه معليش خليني مستهترة خير ليا وليكم وللسبع تاعكم لي جاي يخطب ولات سكتت وخلاتني وكملت النوع اللخر خلاتلي الخالوطة تاع الماعن عرام قاټلي اغسليهم والميناج غدوة عليك غير ارقدي بكري باه تنوضي بكري وتبداي الأعمال الشاقة وليت سكتت محبيتش نهدر انا لساني طويل نخاف نحكي حتى نلقا البليغة في فمي غسلتهم وزدت درت الفطور فطرنا عاودت غسلت الماعن ورحت طحت كاو ديراكت مافقتش حتى للصباح ماما تنوض فيا قاټلي نوضي ياله غدوة الناس جايين لازم يلقاو الحالة واجدة تحكي معايا بالقبايلية انا وماما فالدار نحكو بالقبايلية برك جامي نحكو عربية نحكو مع بابا بالعربية برك باسكو ميفهمش بزاف غسلت وجهي لقيت هاذيك الحية لحقتني وليت غسلت على روحي بدلت وتكلت على ربي نقيت الحالة مالغبار وسيقت الدار بالصابون الله الله مسحت الغبرة من لابيبليوتاك الكانابيات والفوتايات لي فالصالو كامل مسحتهم الحطب تاع الدار عڨبتلو مسحة خفيفة بالبوليش نحيت الرتيلة مالزوايا تاع الشنابر عاودت نشفت الدار بالنشاف وهكدا راني كملت بقالي غير الفراشات برك وخلاص طلعت فوق الكرسي جاي طويييل نحوس عليهم مالخزانة جات ليا ماما نتي والله كاش نهار غير تتكسري مين ندور نلقاك معرشة كي شادي خطړة فوق الخزانة خطړة فالبيبان خطړة فالشجر نتي راني تاكلة عليك تتزوجي وديري دار والله وتروحي للراجل يخلي بنتو ويكمل يربيك نتيا _ اووووه يا ماما تضلي تعايري فيا ياك الشغل نطير فيه الحلوة والطياب والتحليات مكاش لي تفوتني نورمال عقليتي دايرة هكايا واش فيها _ اجبدي الفراشات واهبطي نتي والله مروان يتزوج بيك باه يربيك مع بنتو ضحكت وخليتها والله ماما شويا مريضة جبدتهم وسوطيت جيت على ذراعي بصح نضت نورمال رحت درتهم كامل نفضت الحالة ورحت تكسلت طاقتي نفذت وخلاصت رحت غسلت طرافي وجهي وخرجت لبرا للبحايرة لقيت لبنات متجمعين ويقصرو بقيت معاهم حتى جا بابا وقالي ادخلي باه دخلت .... غدوة منذاك نوضتني ماما بالسيف باه ندوش وجاو جاراتي كل وحدة وش جابتلي روبات نخير واش نلبس وحتى عماتي وجاو محبيتش ندخل للدوش على جال العادة حتى سيفو عليا باه دخلت دوشت مليح وخرجت نشفولي شعري وسرحوهولي دارولي بابيليز مع تاج صغير وجابتلي سميحة جارتي روبة شابة بزاف جاية فالباج بيزو بيزو تحت الركبة ومشقوقة فالجيهتين والفوق ستيل ديباردور مفتوحة بزاف قستها جات سواسوا على لاطاي تاعي كي شافوني قالولي ليوم الاستاذ مروان تاخذيلو عقلو قلتلهم في قلبي ناخذلو عمرو نشاله
مشي عقلو دارتلي بارفان شابة وقاټلي استناي ضكا حتى يجو خرجت للكوزينة لقيت عماتي كامل لابسين وماما ضاربة روبة قبايل صفرة كي الشمس جاراتي ماشطات ومسڨمات الصالو فيه كل انواع الحلويات ماما والجارات نوعو تنواع كبيير كانت كل حاجة في بلاصتها وجابو الفازات تاع الورد حطوهم عند الډخلة تاع الباب تقول اوتال انا نمشي ونتافف مش حابة كامل الزواج هاذا حتمتو على روحي لوكان غير قتلو منقبلش وزيد منيش مستعدة ليه وهوما يضحكو عليا يقولولي باردة القلب الفيونساي تاعك ونتي مريحة وحنا نخدمو وملهوفين كثر منك كي جا بابا وقالنا وصلو ولاو كامل يتجاراو كل وحدة وش من شومبرة دخلت غير انا بقيت مسمرة في وسط الكولوار و مخلوعة لاه يجرو هكا شافت فيا ماما ادخلي يا شاماتة ادخلي نتي لي تستقبلي واقيلة تاففت ودخلت للوشمبرة لقيتهم ثما قلتلهم يرحم باباكم لاه زعمة هربتو كامل انا العروسة ومفهمتش لاه هربتو
يتبع