الحلقة الثالثة من فانتازيا جواز نبيل من نوفا

عفشي 
تغمزها درية اسمعي كلامي يا حبيبتي واوعدك مش حتخسري 
تفكر نوفا قليلا وتكتشف أن درية ست مش سهلة واكيد حتختار حاجات حلوة واحلي من عفش بيتهم.. هو صحيح مش مريح لما نزلوا عيد الميلاد وقعدوا عليه بس برضه قيمة وسيما 
جاء اليوم الثاني ونزلت فاطمة ونوفا لانتظار فهيم أفندي عند درية 
جاء فهيم افندى ببدلته والاقلام الملونة منورة جيبه 
فاطمة حنروح فين يا فهيم أفندي 
فهيم حنروح زعزع وبعد كده النهضة وبعد كده الست درية ضغطها حيعلي وتاخدنا نجيب عفش ستيل تمنه 62 الف جنيه و جنيه وخمسين قرش
نوفا تهمس فاطمة طب وبابا 
فاطمة حيوافق ده ابوكي وانا حافظاها حيحسب الحسابات ويدخل في الهنا ينام 
أما فتحية بعد ضياع نوفا منها تظل تعاتب خضير ليل نهار 
فتحية انت اللي ضيعتها من ايدك يا ضنايا 
خضير كنت عاوزني اعمل ايه يا ماما 
فتحية ما انا يا ما قولت ويا ما عدت ياما قولت وياما عدت... قولتلك من زمان ربي شنبك قولتلي حيكبرني قبل الأوان واهو جه التاني وخدها 
سيد خلاص يا فتحية 100 مرة اقولك كل شيء قسمة ونصيب 
فتحية تسخر منه كل شيء قسمة ونصيب بس لسه لسه فيه أمل يا ضنايا مدام راحت نوفا يبقي بلاها نوفا خد سنية 
نزلت فاطمة ل درية عشان تقولهم أن العفش جه وحيرحوا يفرشوه وقدم لهم الطباخ كريم كراميل 
أكلت فاطمة وتركته فورا 
درية ليه كده 
فاطمة ما بحبش العلب مش قادرة تقولي للطباخ يعلموا في البيت بدل دريم ده اللي لا ليه طعم ولا لون 
درية طيب يا حاجة انا مش عاوزكي تتعبي نفسك انا حافرش الشقة بنفسي 
فاطمة كفاية بجاحة بقي 
درية افندم 
فاطمة غاضبة افندم ايه وزفت ايه بقي نجيب شقة ونجيب عفش تمنه 62 الف جنيه و جنيه وخمسين قرش وانتوا يا دوب جبتوا علبتين دريم كريم كراميل وقاعدة حاطة رجل علي رجل كمان وهو الفرش ده جديد علينا ده انا عندي فوق شقة ست مطارح يرمح فيها الخيال وفسحة قد كده وأوضة مسافرين هو الفرش ده جديد علينا ما فيش حاجة جديدة علينا ده احنا عندنا عمارة مترترة قد كده 
الوزير طبعا طبعا يا حاجة ده انتي الخير والبركة بس قصدي درية يعني أنها ما تتعبكيش
فاطمة بغيظ والنبي اسكت انت يا عم الوزير وروح اقرا الجورنال .. ما هو انت لو ليك كلمة ما كنتش وافقت ابنك وأمه على كل ده 
تحزن فاطمة وتريد أخبار عبد الغفور ولكن نوفا تتدخل ما تسيبها تفرشها ويتهد حيلها وهو لازم احنا نتعب 
فاطمة يا بت بلاش تبقي سهلة كده حيركبوا ويدلدلوا رجليهم 
نوفا ما تقلقيش يا ماما ليهم روقة بس الجوازة تتم وانا حاطلع عينهم واحد واحد وأولهم درية وبنتها واجيبهم لعندك يقفوا يغسلوا المواعين 
فاطمة والنبي انا خاېفة منك اكتر منهم 
خرج نبيل ونوفا في ميعاد
رومانسي على شط النيل
نبيل نوفا دلوقتي بعد ما ابوكي جاب الشقة وفرشها لسه ما قولتوش حنعمل الفرح فين
نوفا هو انت البعيد ايه... عاوزين فرح كمان هو انت فاكر ابويا ده ايه
نبيل يا نوفا يا حبيبتي الحياة فرص وابوكي فرصة استحالة نضيعها من ايدينا ولازم تساعديني في ده عشان نعيش مع بعض حياة سعيدة
نوفا يا نبيل انا معاك ان فلوس ابويا كتير ولازم يكبش ويدينا بس انتوا بجحا اوي 
والي اللقاء في حلقة جديدة