اسكريبت تخفيف احمال بقلمى ميمى عوالى

ناحية ده اللى لو النور مارجعش هنسلمك كده لعريسك و انتى نص تشطيب
سهى بضحك والنبى لو حصل لاتطلع بعد كده موضة و اللا بقى لو طلع منعم من تحت ايد سيد و هو كمان ناحية و ناحية
عند منعم ماكانش فعلا الوضع يختلف خالص عن الوضع عند نرمين سيد الحلاق كان مشغل ماكينة الحلاقة الكهربا و بيظبط له شعره و كان برضة ظبط له جنب و لسه الجنب التانى وقت ما النور قطع فسيد قال بغيظ و بعدين بقى فى وقف الحال ده 
منعم بزهق و بعدين .. دى الساعة عدت اربعة بكتير و انا لسه ورايا حاجات كتير عاوز اعملها ماتخلص يا سيد شوف ممكن تعملى ايه مش محتاج كهربا 
محمود صاحب منعم اكيد فى حاجة ممكن تتعمل يعنى و اللا ايه يا سيد
سيد فتح درج و طلع منه بكرة خيط و قال له مافيش غير الفتلة بس تعالى احلق لك دقنك مانيوال بقى الاول و امرنا لله 
منعم بتحذير عارف لو عورتنى النهاردة بالذات هيبقى يومك بؤبؤى
سيد بهزار ياعم ماهو يومنا بؤبؤى و فحلقى اهو من غير اصابات اصلا قرب بس ماتخافش 
سيد حلق لمنعم دقنه و بعدين ابتدى يروشه بالفتلة و محمود ماسكله كشاف الموبايل و كل شوية سيد يزعق لمحمود و هو بيقول له يابنى الكشاف على وش صاحبك مش فى عينى الله لا يسيئك
محمود ما المكان ضيق يا سيد .. اعمل لك ايه طيب
سيد بزهق نور على وش صاحبك 
محمود هنور يا عم اهو 
و فجأة منعم صړخ بعزم مافيه و قال ااااه انت عملت ايه الله ېخرب بيتك 
سيد بخضة في ايه بس ورينى ماتخافش ماحصلش حاجة 
منعم بنرفزة اوريك ايه بس ربنا ينتقم منك شيلت لى نص حاجبى و تقوللى ماحصلش حاجة ياسيد .. انت مش شايف انت عملت ايه 
سيد بتبرير ما محمود ضارب الكشاف فى عينى يا جدع و مش شايف 
منعم كشاف ايه بس الله ېخرب بيتك ده انت سوهت وش امى
محمود قرب الكشاف من وش منعم و هو بيشوف اللى حصل و قال و ده حله ايه ده
سيد اصبروا بس انا هتصرف 
منعم بغيظ و هتتصرف ازاى بقى ان شاء الله هترسمهولى بقلم كحل و اللا هتشيلى حاجبى التانى عشان يبقوا زى بعض
هنا محمود ماقدرش يمسك نفسه من الضحك و قال تصدق القلم الكحل ده فكرة جاحدة و ممكن تطلع لوك جديد و تريند بس تفتكر هنلاقى درجة كحل لون شعرك
منعم بعد ما كان متنرفز ابتدى يفك و يهزر و هو عمال يجيب وشه شمال و يمين و يشوف شكله و بعدين قال بامتعاض البت نرمين دى حظ امها فقر من يومها حتى يوم ماخلاص هنتلم على بعض .. هتستلمنى ناقص حتة 
سيد بضحك خد بالك ابوها مش هيسيبك و تلاقيه كاتب حواجبك دى فى القايمة 
منعم بټهديد انت كمان ليك نفس تهزر بعد عملتك السودة دى طب تعالى يا عملى الاسود خلص اللى كنت بتعمله
سيد طب مش نشوف الاول هنعمل ايه فى حاجبك اللى اتاكل مقص ده 
منعم و لا تشوف و لا تتنيل بكره ينبت و يزرع تانى 
محمود بضحك طب انده على البت رانيا تناولنى قلم كحل من عندها
منعم بټهديد اخشع ياد و اتلم كحل ايه ده اللى هحطه 
سيد باحراج طب لو حد سألك هتقول له ايه
منعم بسخرية هقول له تخفيف احمال يا خفيف
عند ام منعم .. كان معاها جارتها ام ليلى