رواية جـرح_الـمـشـاعــر بقلم_امال_جوري البارت الاول حصريه وجديده

رواية جرح_المشاعر
بقلم_امال_جوري البارت الاول حصريه وجديده 
قاعدة على الكانابي نتفرج في حصة شاف تاع طياب شفتها تدير في وحد باطاطا فالكوشة بالحوت والروز عجبتني قلت لماما نروح نشري الحوت ونجي اصلا راه جا مول الحوت في وقتو خرجت بروبتي تاع القبايل مضارية نخرج بيها معنديش مشكل في ريفنا كامل نعرفو بعضانا تقول عايلة وحدة باسكو نفتلو طعام مع بعض ونعجنو المطلوع ونبيعوه شغل قبيلة مزالنا كما تاع بكري كامل تقليدين ونحبو هاذو المواضع خاصة في وقت الزيتون كي نروحو نڨلعوه رحت لمول الحوت نعرفو يجي بزاف يبرح و يروح شريت هاذاك الخشين لقيتو مشي غالي بزاف ووليت للدار قابلتني ماما واش رانيا لقيتي الحوت راني شفتك مابطيتيش _ ايه ماما لقيتو شريت ثم ثم ووليت ونتي راني شفتك خارجة وين بيها _ رايحة للجارة نجيب منعندها كاش حشاوش نديرهم لباباك مسكين ياك راه في حالة وهي كبيرة تعرفيها تعرف للحشاوش _ ايه بابا مسكين والله راه مشي غير في حالة برك وزيد ملي زاد دخل خويا للحبس زاد كمل عليه وراح فيها كامل هاذو اليامات يا ماما لا شفتو مهوش مليح ندبر منين نطلعو للسبيطار فالمدينة وماتقوليليش خلاص وضك يبرى ونعرفك كي تبداي تهدري علابالك بلي بابا عزيز عليا بزاااف _ يا بنتي نشاله مايكون غير الخير وراحت وليت رحت طليت على بابا لقيتو راقد مسكين بستو من راسو و رحت للكوزينة جبدت الحوت هاذاك نقيتو وغسلتو وزدت نحيتلو الشوك ودخلتو للكوشة يتشوا ووجدت لاصوص قطعت باطاطا ودرتهم مع بعض لداخل وخليتهم كي طابو طفيت عليهم ورحت لبيتي ديت روبة من روباتي نصهم تاع قبايل وحدة نوار وحدة حمرة وحدة صفرة كل وحدة بلون نلبسوهم بزاف نعتابروهم رمز تاع البلاصة لي عايشين فيها مع بعض وتقريبا جميع النسا تاعنا يلبسوهم ويدورو بيهم وين يروحو رحت للدوش دوشت لحمي كانت سخانة تصرع ووليت للشومبرة درت ليبوماد  صح حنا معندناش وكما يقولك حشېشة طالبة معيشة ماهنا هنا بصح والله نورمال 

نحب نعتاني بنفسي وبنظافتي بزاف نحب ندير ليماسك ليبوماد مرطبات مي ماكياج ممنوع بابا ميقبلهوليش ومانعو عليا منعا باتا نحب ثاني نعتاني بشعري لي جاي متوسط فشاتا زيني انا بالنسبة ليا يجيني عادي بشرتي بيضة تسطع متهلية فيها ڨراف عينيا نوازات فمي كبير نيفي صغير عندي فوسات جيهة ليمنة حمد لله عندي كل حاجة والكمال لله جسمي كيما اي طفلة عشرينية فاالعمر تاعي عندي 24عام وربي يطول في عمر كل واحد وانا ثاني طفلة قبايلية هي فالاصل عربية باسكو بابا عربي وماما لي قبايلية مي عايشين مع القبايل ونهدر غير بيها نهدر عربية بيانسور بصح قبايلية كثر وزيد نشبهلهم تقول من سولالتهم بعد ماكملت العناية الحريصة على اناقتي لبست روبتي ورحت للكوزينة وجدت الغدا لبابا وانا حطيت ليا ناكل علابالي ماما متحبش هاذي بالاك دوك تاكل زيت ولا كاش حاجة انا هكاك وسمعت بابا يكح وحاشاكم صوت تاع قيا رحت نجري لقيت ماما حاطتلو باسينة يرجع فيها ويسعل عمرو راح تخرج كي شفتو هكاك الدموع تحجرت في عينيا مانحملش نشوفو هكا هو من بكري قليل صحة مسكين وزاد كمل عليه خويا حكيم لي دخل للحبس قبل عامين