رواية چرح المشاعر الفصل 70-72-73-74-75 بقلم أمال جوري حصريه وجديده

الحق في كل حاجة حتى انا رايي من رايك بصح لازم نفهمو الطفلة شافت معايا يا رانيا ارجعي لدارك خلاص راكي نتاقمتي كيما قال مروان ارجعي لدارك راكم ذراري كي نتي كي هو وحنا نتبعو فيكم ارجعي راكي هبلتي السيد وهملتي بنتو ارجعي _ يايما منرجعش منيش حابة نرجعلو وانا علابالي كيفاه كنت عايشة معاه كاين صوالح انا علابالي بيهم ونتوما معلابالكمش بيهم راني حاباتو يطلقني _ شوفي نقولهالك هنايا مروان وليدي راسو خشين وميطلقش راهو حاكم فيك وهو سامط يبقا يسمط يسمط يسمط حتى يرجعك عندو اخاااه السامط تلاقا مع السامطة ارجعو لبعضاكم وهنونا حنا لي تجرجرنا في بلاصتكم اويلي شافت معاها ماما راكي تشوفي يا ختي انا رجعوني كي ساعي البريد ننقل فالبراوات السامط تاع وليدك يقولي وصليلها والسامطة الرهجة تاع بنتي تقولي وصليلو وماحبوش يفهمو بينزوج ويخلوني في حالي ترونكيل _ نقولك الصح اعقيلة انا کرهت منهم بينزوج كل واحد مخشن راسو خلاص خلينا منهم ضك يرجعو لبعضاهم ونخرجو حنا الخاسرين شافت معايا نتي تحبي وليدي ولا لالا حركت راسي بايه _ وهو ثان يحب جدك ارجعو وهنونا والله الواحد باه يروح يدير عمرة يعبد ربي سبحانو مزالو يتبع في هبالكم بصح والله صح هبلناهم مساكن خاصة ماما ولبنات غير يضحكو بقا يهدرو حتى قالتلها ماما لعجوزتي يا ربيعة ختي انا هادي السمانة نهار الجمعة رايحة نخطب لوليدي حكيم زعمة انا قلت لا تروحو معايا رانا فاميلية قبل نساب _ والله نجي اعقيلة علاه حتى منجيش ايه نجي نورمال ومبروك عليه نشاله تكمل بالزواج _ ان شاء الله اختي قالتلها العقۏبة للسامطين يولو لبعضاهم ناضت ماما تعوج في فمها عليا وقالتلها ااامييييين نشاله زادو شويا وراحو .
ديري الجام متنسايشجزء
بنهار الخميس جاو عماتي كامل باه نروحو للخطبة سلمت عليهم ورحبو بيا عندهم بزاف مشافونيش هاداك النهار دارتلنا ماما وحد شخشوخة تهبل وتقطر بالبنة تعشينا في رحبة وبتنا في شومبرة وحدة حتى وبنات عماتي جاو بايتين نقصرو مارقدناش حتى للزوج تاع الليل .. الصباح نضنا نفرسو فالدنيا درنا طعام باللحم تغدينا بيه وغسلنا الماعن صلينا الظهر ومور الجوموعة جا خويا وحنا رحنا للشومبرة انا قلت نلبس روبة شابة جاية فالغوز بونبو بحزامها سطوندار وماكييت ماكياج خفيف كلش غوز لبست طالو في رجلي ولحت العباية مالفوق والخيمار وهبطت التحت لقيت ماما لابسة وماكية يادرا شكون ماكيالها رحت عندها عنقتها اووووو عقيلة راكي تهبلي _ ايه معليش بعديني راهي سخانة جاني الضحك عليها لقيت خويا لابس الله الله قتلو حكيم راك شباب شريت باتيسري والورد _ ايه كلش واجد بقيتو غير نتوما لا كملتو هيا نروحو _ مالا كملنا ورانا واجدين ناضت عمتي تزغرت يويويويويوويويييي خلاتها بالزغاريت حتى صونا الباب ماما راحت تجري حلت لقاتها عجوزتي واية وصفية سلمت عليهم حتى خويا سلم على عجوزتي ولاح السلام على اية وصفية زدت سلمت عليهم انايا قلتلهم راكم تهبلو_ اسكتي اسكتي نتي لي راكي تهبلي تهبلي لوكان يشوفك مروان يزطل بالخل ضحكت برك ناضو يزغرتو وخرجنا انا وزوج عماتي وبنت عمتي ركبنا مع راجل عمتي ثاني جا ديمارينا طريق شويا طويلة مي غير وصلنا قدام دار الطفلة هادي ناضو يصونو بالطونوبيلات سطاسيوناو في طريق وحدة ونزلنا بقيت نحوس بعينيا على مروان حتى طاحت عيني في عينو كان هو تاني يشوف فيا يااايما فاقلي